اليوم العشرين من التحدي
مساء الخير اصدقائي
بدأت رحلتنا على النهاية خلصنة 20 يوم من التحدي باقي فقط 9 ايام تعلمت اشياء اكثر من اللغة بس تعلمت من خلال الكروب المشترك اشباء عن البرمجة والتصميم والكتابة والتأليف برغم اني كلش قليل اشارك وياهم بالحديث لكن متابعة دائمة لحديثهم لان كلش مفيد صراحة والكروب مختلف عن باقي الكروبات لانهم جدا واعين ومحترمين
حاليا مكثفة الكتابة حتى احسن خطي كاعدة ادرس وادرس مع بنت اخوية صف ثالث متوسط انكلش ومستمتعه وياها كلش
هدفي من التحدي من البداية ان يصير شي يخليني التزم بالتعلم وما اترك مثل كل مرة واستفيد من المعلومات الي تعلمتها من تجاربي السابقةوايظا اربح السفرة 😁 اتمنى اسافر واحقق حلمي بالسفر وبعدني استخدم نفس الادوات الي هيه طليق و zamericanenglish وضفت duolingo وقرائة قصص القصيرة باللغة الانكليزية
خصصت وقت كل يوم 35 دقيقة مرات ساعة على حسب الواهس 😐بداية التحدي كنت راضية عن نفسي لكن بعدها تكاسلت كلش بس مع ذالك جبرت نفسي ان اكمل بالتحدي حتى احقق شي لذاتي
وتعلمت الاستمرارية بالشي الي ابدي بي وما اترك بمجرد ان اضوج او اتعب ضروري اكمل اي شي ابلش بي
لان صراحة شعور الرضى والفرح الداخلي الي يشعر بي الانسان بعد ما يكمل الشي الي يبلش بي شعور مريح للنفس برغم ضغوطات الحياة ومشاكلها
فاجأتني بعض الكلمات ان هيه كلش طويلة 😨 وصعب نطقها بس من خلال تجزيء الكلمة يسهل نوعا ما النطق بس بالنهاية احس حنجرتي طلعتلها عظلات 😅 هدفي القادم التطور اكثر بالعديد من المجالات منها التصميم الي حبيتة جدا من خلال كلام اعضاء الكروب
الخطة حاليا نفسها مافكرت بشي جديد بس اتمنى عقلي ينفتح شوي بفكرة مميزة 🥲 بس مع ذالك واثقة ان راح افوز واحقق هدفي وحلمي بنهاية التحدي
وفي نهاية التحدي اي بعد 10 ايام راح اكتب المنشور كامل باللغة الانكليزية بدون مساعدة المترجم اكيد مااغش وعد🙁✋
ملاحظة /اعتذر عن ملأ الاستمارة يوم 10 بسبب ضعف النت عندي
وشكرا للجميع 🌸🌸
تعليقات
إرسال تعليق